الأربعاء، 15 أبريل، 2009

هذا ولدنا صوتوله

لما انحل المجلس قبل اسابيع ... صار في حملة لا ارادية من الشارع في اننا نرغب في اعضاء جدد وبأن نحسن اختيارهم
لأن المرحلة المقبلة بحاجة لمجلس متميز وراقي ومثمر ولا اخفي عليكم بحاجة ان يكون له كاريزما

شلون تكون كاريزما .. العادة تكون الكاريزما لأشخاص لا لمجلس ؟؟!!

أنا اقصد كاريزما في انسجام الاعضاء مع بعضهم البعض
لاحظوا ادارة باراك اوباما الجديدة واختياراته لمن حوله ... كل شخص اختاره لسبب فيه فائدة للولايات المتحدة الامريكية أولا قبل اي اعتبار
ولكن للاسف الشديد اذا حولنا الموضوع بالكويت ... بنشوف التالي .... ولدنا .... من ربعنا ... من طائفتنا ... من مذهبنا ... ولد فريجنا
ومن بين كل هالامور نادر ما نلاقي شخص واضع اجندة لها اهداف اصلاحية قابلة للتنفيذ
لأن من يضع هذه الاهداف نجده عندما يدخل المجلس ماله حس وخاموش ولا يبطل حلجه بكلمة مفيدة

any way الانتخابات ياية بالطريق
وواضح من اجتهادات بعض المدونين في تلميع بعض الاسماء المكررة

وين اللي يبي التغيير وطرح اسماء جديدة ترتقي بالكويت وترجعها عروس الخليج ( اي هين )
المشكلة ان المجلس انحل وبترجع نفس الاسماء بتغييرات طفيفة لن تقدم ولن تؤخر
ماني متشائم ولكن هذا حالنا ...
التحدي ان تتغير جميع الاسماء ( ايضا ... اي هين)
واخترنا الافضل بقناعة غير مرتبطة بهذا ولدنا وهذا من قبيلتنا واللزي منو من خرابيط قاعدة تصير بحياتنا بالكويت

الثلاثاء، 7 أبريل، 2009

معاملة حكومية + تدليع نفسي

منو فيكم كان عنده معاملة حكومية واستمتع فيها

اي استمتع فيها .....

انا لما يكون عندي معاملة حكومية ، استمتع لما اروح اخلصها
مع استبعاد العوامل الاخرى من تأخير وعبط في روتين انهاء المعاملة

ولكني استمتع في رؤية هالبشر والاشكال الغريبة العجيبة
تلقون شايب ومعاه زوجته الشابة ..... كلش مو ياي يكتب ممتلكاته حقها ... وساحب السيفون على عياله
ولا تقولون شلون تعرف انها زوجته مو بنته ......... لأن الموضوع واضح يا جماعة الخير


وذاك الصوب تلقون مجموعة من الالمان زايرين الكويت
بس مشكلتهم ان اسمائهم مالها معنى ....... شخبوط ، قفشة ، زعلان ، جنجفة ، هفهوف ، خنفروش

هي اسماء وماهي باسماء ==> عليكم فك اللغز :)

اذكر واحد من الشباب تعرفت عليه باحد المعارض اسمه مطلق( اسم ماشي حاله ونقدر نقول انه مقبول نوعا ما) ماامداني اطيح معاه سوالف
جان يقولي انه اسمه الاصلي مو مطلق... ( وكان اسمه القديم شئ ظيم .. كسر خاطري)
وانه اول ما كمل 18 سنة راح على طول غير اسمه في ادارة تغيير الاسماء....

يعني ماادري شلون يفكرون اهالي هالناس حتى الرسول عليه الصلاة والسلام كان يغير اسماء صحابته المتشائمة الى اسماء متفائلة.

اي صح نسيت اقول لكم تميز الكويتيين في عملية تخطير الادوار
وياحلوهم لما يستعبطون ويسوون نفسهم ما يدرون ،، عاد صاير انا هاليومين شري
اذا احد طافني لازم اقط عليه قطه اخلي ويهه يصير أحمر ( اذا كان يستحي )
ويصير ويهه ازرق اذا كان ما يستحي لوووووووووووول

انتقل الى ديزاينات بعض هذه الاماكن الحكومية
تلقون مسويين بعض المكاتب غرفة استقبال
والبعض الاخر مسوي مكتبه غرفة نوم ، مابقى غير تييبون معاكم لحافكم وتنامون هناك
طبعا هالاماكن ريحتها حلوة

اما في اماكن حوسة البشر من دخول خروج !!
فالله يعينكم على الروايح التعيسة ...... بتلاقون اللي مو متسبح صارله سنة
واللي حايس بالمجمع من الصبح مو عارف وين معاملته

اي صح اكبر تخصص لموظفات وموظفي الحكومة ( متعمد حاط اسم الموظفات قبل الموظفين الرجال )
اكل الريوق وتعطيل مصالح الناس ... أكلم الموظفة من صوب وصمونتها باليد الثانية والطماط معلق بين ضروسها ععععع
والشباب سحيكة زقاير ... اليد اليمنى صمونة واليد اليسرى زقارة مسحكها وواصلة الى الفلتر


واللي واللي .....

ومع كل هذا استمتع ( مع استبعاد العوامل الرافعة للضغط )
شاو