ايتها المدونات المشهورة ...شهالمصاخة ؟

تحديث
التحديث مكتوب بالخط الاخضـــر بالاسفل

اعترف وانا بكامل قواي العقلية اني من المتابعين الوفيين لكــم
ولكن يرجى تحملي بانتقادكم نقد ايجابي باذن الله :)

أولا :
التكرار بينكم شئ مو طبيعي ،ومثال على ذلك فالنفرض ان " بينك بيري" نزل نوع جديد من اليوجرت او مثل ما حصل قبل كم يوم بنزول جهاز الايفون4 وقبله نزول الايباد
بتلاقون ثلاث ارباع هالمدونات تكتب بهذا الموضوع وبشكل ناقل للخبر فقط لاغير .... طيب وين الاضافة وماهو الفرق بينكم وبين الجرايد؟
اذا بتقولون رايكم اللي اهوا موافق لآراء الاغلبية يرجى عدم الكتابة وتضييع وقتنا اما اذا عندكم اضافة جديدة
فأهلا ومرحبا برأيك الجديد

ثانيا :
صدقوني اللي بقوله الحين ماهو حسد ولكـن
ماهي ميزة اصحاب المدونات اللي انا اسميها البسيطة واللي مافيها تعب غير نقل اخبار ووضع تعليق أصغر من النملة عليه دون اي اضافات تذكر ؟ ويخبون نفسهم اذا صار هناك ترشيحات لأفضل مدونة وتكفة رشحوني ....... صراحة الترشيح لن يكون الا اذا كانت عملية الترشيح مقسمة تقسيمات صحيحة مثل :
قسم الاخبار وكل ماهو جديد -- قسم الكتابة الحرة --قسم الابداع -- -الــخ وقيسوا على ذلك

وفوق هذا وذاك يكتبون بالانجليزي المعرب وهي ادنى لغة يتم التحاور بها لغويا ، بس وين اللي يسمع خاصة اذا الموضوع وصل مواصيل الهبة الكويتية واللي تعتبر شئ مقدس لايجب المساس فيه ولا انتقاده ( الله يعيني على مساسي بها ) يعني ياجماعة الخير كتبوا ولكن يا ابيض يا اسود يا عربي يا انجليزي ..... انا شاك ان فيكم ازدواجية دفينة
ولا اعرف لماذا تتم مقابلتكم بالمجلات والجرائد والتلفزيون وكأنكم ابطال والشئ الوحيد اللي سويتوه انكم نقلتم مواضيع؟( لاانكر استفادتي بمعرفة بعض ماهو جديد على الساحةمنكم ) ولكن الكلام موجه الى وسائل الاعلام المختلفة وينكم عن المبدعين الذين فعلا امتعونا بالكتابة التدوينية وينكم عن عمالقة التدوين الابداعي؟ فالتدوين اولا واخرا معناته الكتابة والتنوع بها وليس نقل الصور والفيديو فقط
اعيد واكرر ان ما يفعلونه الاخوة والاخوات شئ جميل ولكنه لا يستحق هذه البروباجندا
فهناك الافضل والمستحق للتركيز عليه ، فانا افرح لرؤيتكم عبر وسائل الاعلام ولكني احزن لعدم رؤية الذين يستحقون التركيز عليهم أكثــــر اعلاميا .

ثالثا:
دخول الرعايات التجارية على المدونات
هي خطوة رائعة وجميلة ولكن للاسف الشديد اجد ان بعض المدونات تغيرت ارائهم بسبب هذه الرعايات
نجد الواحد فيهم يذم باحدى الشركات ولما تتقدم لرعاية مدونته يصير خاتم بصبعهم
"ماادري ليش تذكرت بعض اعضاء مجلس الامة وانا اتكلم بهالنقطة لووووول" .

زبدة الحديث اني احب مدوناتكم ولا اقدر افارق متابعتي لها ويمكن في بعض فترارت تدويني البسيطة تأثرت باسلوبكم ولكنه بالنهاية نقد بناء اتمنى ان يجد اذانا صاغية

رابعا
سامحونا على القصور واقبلوا مني الوردة اللي في بداية الموضوع :)

اخوكم رزنامـــــــة


.