لقد اصابني البارحة ديجافو وانا اتابع مشاهد افتتاح مجلس الامة ولكن مع بعض البهارات و الاضافات المفاجِأة بتوقيت الطرح من بعض الاعضاء (تعريف الديجافووو Déjà vu : وهي ظاهرة تحدث لكثير من الناس و يحسوا بأنهم عِاشوا الاحداث من قبل وأنها ليست تحدث لأول مرّة)
الخرافي استلم القيادة ( بكل تأكيد وتزكية ) وقايدنا في بحر الظلمات والله يستر علينا
دميثير يصرخ وعلى باله انه فضح الحكومة ... يعني ماتدري ان الحكومة تحب التهويش خخخ
نائباتنا الفاضلات : أولا معصومة المبارك
على بوكنتي وزيرة مطيحة الميانة مع الكل ( يعني تقول حق النائبات الجدد تراني راهية وعندي معارف وايد ) بعدين شسالفة كل ما سولفتي مع احد مسكتي ايده ... حتى سموالامير ما سلم منها وهي ماسكة ايده وقت الصورة الجماعية ( شهاللصقة ) درينا ان الحكومة فوزتك بس عاد لا تفضحين نفسك جذي .
رولا دشتي : يا كثر ما حستي امس ، ويا كثر ما تلفتي يمين ويسار ويا كثر ما سولفتي
وعند اخذ الصورة التذكارية مع سمو الامير زين ما طبيتي سلايد على بو تبين ترتزين بالصورة ( لا يكون عبالج الصورة الجماعية للمنتخب قبل المبارة الرسمية ......)
لما تكلم النائب علي العمير عن موضوع الحجاب كانت رولا تبولع ريجها ( يا ترى ليش ؟؟؟ ... )
أسيل العوضي : مشاعر متناقضة ( من هدوء ، الى حوسة ، الى تفرفر بالكرسي وبالنهاية لما تكلموا عن الحجاب ضحكت ضحكة ماادري شلون صايرة( ولها الف تفسير ... ) وبغض النظر عن مافعله بعض المتدينين فيج ( وهؤلاء نقدر نقول عنهم المتأسلمين ) فاتمنى ان لا تكون ردة فعلك عليهم تمس كل من هو متدين التدين الصحيح وويكون خايف عليج مو منج.
سلوى الجسار : ماادري ليش احس ان في كل موقف تتكلمين فيه يكون فيج ضحكة ....
وقت القسم : يا كثر تأليف واضافات وأخطاء النواب ( هذا والقسم معروض جدام عيونكم وانتوا موعارفين تقرونه صح)
اللي يقول أقسم بالفتحة فوق الهمزة
واللي يقول واودي اعمالي بالامانة والصدق
واللي يقول وأؤدي امعالي بالامانة والصدق
واللي يضيف ديباجة قبل القسم و اللي يضيف بعدها
وذيج تقول أزود عن حرية الشعب
ونصهم دكاترة بعد ....
من ناحية اخرى :
مرزوق الغانم وصالح الملا وأحمد السعدون صايرين محامين عن الحريم السفور بالجلسة ولما قعد السعدون يحن على السلطان في اخذ فرصته للتعليق على الجدال اللي صار
سأل السلطان مرزوق منو قبل طلب الكلام؟
فقال انا قبل
فالتفت عليه السعدون وعطاه ذيج النظرة الحراقة
اللي خق عقبها مرزوق وقاله تفضل طال عمرك تراني متنازلك خخخخخخخخخ
مشهد فعلا ممتع ووجميل وفيه احترام وخوف من السعدون بنفس الوقت
بالنهاية
ترى كل شي بالمسطرة قاعد يصير
واعتقد ان شعب الكويت كله عايش بحالة الديجافوو اللي حايشتني من امس
والنهاية عارفها الجميع
وهاردلك للمتفائلين
اشكرك على هالموجز
ردحذفالبسيط اب طرحه و المفصل اب معانيه عن اللي صار البارحه
او مثل ماقلت
Déjà vu
او لا طبنا ولا غدا الشر
مرحبا الساع يا مريم
ردحذفالله يستر علينا بس
من زمان ما كتبت شي .. وينك يبا نبي نقرا لك :)
ردحذف